Årdal og Lærdal Ap vil ha fødeavdelinga på plass att

Lærdal Arbeiderparti vil ha tilbake fødeavdelinga ved Lærdal sjukehus. Og får støtte for dette synet hjå Årdal Ap.
-Sjukehuset i Lærdal er like mykje vårt, så dette framlegget støttar me. Eit velfungerande og godt fødetilbod i Indre Sogn er heilt nødvendig. Samstundes er det veldig viktig at fylkespartiet grip tak i og diskuterer totalinnhaldet i lokalsjukehus og kva funksjonar desse skal ha, seier leiar i Årdal Ap - Hilmar Høl.
Medlemsmøte i Lærdal Ap og representantskapen i Årdal Ap har denne veka behandla fylkespartiet si innstilling til helse- og sjukehuspolitikk. Representantskapen i fylkespartiet gjer endeleg vedtak fyrstkomande laurdag.

KJEMPAR FOR FØDEAVDELING
Lærdal Ap kjem her med framlegg at det skal vere eit godt og forsvarleg fødetilbod i alle deler av Helse Førde. Det betyr også at lokalsjukehusa i Nordfjord og Sogn skal ha fødeavdeling med gynekolog i døgnberedskap. På medlemsmøte vart det stillt spørsmål om ikkje kampen for å få tilbake fødeavdelinga var tapt, men Iren Lysne meinte dette var noko ein verkeleg måtte kjempe for å få på plass att.

-Skal me ha eit framtidig fødetilbod i Lærdal må me gå inn for å få tilbake fødeavdelinga. For held ein fram ordninga som i dag trur eg fødetilbodet vert lagt ned av seg sjølv, sa Lysne. Innstillinga frå fylkespartiet peikar og på kor viktig det er å jobbe kontinuerleg med rekruttering, Lærdal Ap meiner ein må skape ro i helseføretaket for å få dette til - stadig omorganisering, uvisse og innbyrdes krangel er dårlege signal å gje til potensielle arbeidssøkjarar til stillingar i Helse Førde.

• Les heile saka på Porten ved å klikke på overskrifta her